A Aula Permanente de Música Tradicional do Campus de Pontevedra é un espazo formativo no que a 
música tradicional debe achegarse dende un enfoque lúdico á vez que proporciona ferramentas para o 
coñecemento da cultura galega a través de varios eixos: a adquisición das habilidades necesarias 
para a interpretación musical, o coñecemento da teoría musical e a comprensión dos aspectos sociais 
e culturais nos que se enmarca a práctica da música tradicional e popular.
A docencia estruturarase en torno a tres especialidades que garantan a continuidade da maioría do 
alumando matriculado nos anos anteriores: gaita,percusión tradicional e zanfona. A maiores, a 
práctica de conxunto incorporaría a montaxe puntual de repertorio de canto colectivo, entendendo o 
repertorio vocal como un dos eixos nos que se estrutura a música
tradicional galega.
 

Os obxectivos dun grupo como a Aula Permanente poden tomar como marco de referencia, pola 
semellanza do proxecto, os da Orde de 11 de marzo 1993, pola que se regulan as condicións de 
creación e funcionamento das escolas de música e danza da Comunidade Autónoma de Galicia. Sirvan de 
mostra os seguintes:
- O1. Fomentar o coñecemento e apreciación da música
- O2. Desenvolver unha oferta ampla e diversificada da educación musical
- O3. Ofrecer un ensino instrumental orientada á practica solista e conxunto
- O4. Proporcionar un ensino musical complementario á práctica instrumental
- O5. Fomentar o interese pola participación e agrupacións vocais ou instrumentais
- O6. Organizar actuacións públicas e participar en actividades de carácter afeccionado Estes 
obxectivos poden concretarse, no marco específico dun proxecto vencellado á música tradicional 
galega, do seguinte xeito:
- O1.1. Coñecer e apreciar a música tradicional galega nas súas diferentes manifestacións vocais e 
instrumentais.
- O1.2. Garantir o recoñecemento e diferenciación dos diferentes xéneros e ritmos que conforman a 
tradición musical de Galicia.
- O2.1. Achegar a música tradicional ós diferentes sectores de poboación como un elemento máis da 
cadea de transmisión da cultura propia.
O3.1. Ofrecer espazos para a práctica instrumental solista dentro de práctica grupal atendendo ás 
características das formacións de música tradicional propias.
- O3.2. Desenvolver e consolidar un repertorio de conxunto, atendendo á expresión musical

e á afinación para practicar a interpretación en grupo nunha formación habitual do
instrumento.
- O4.1. Adquirir coñecementos básicos sobre os principais intérpretes e o seu repertorio e as 
diferentes cornamusas para ser conscientes da importancia de preservar o patrimonio da música 
tradicional.
- O4.2. Adquirir coñecementos básicos de teoría musical que permitan unha achega máis consciente á 
interpretación musical.
- O5.1. Coñecer as diferentes formacións propias da música tradicional galega, así como as novas 
formacións baseadas na música popular galega, e fomentar a participación do alumnado nelas.
- O6.1. Realizar audicións públicas prestando atención ós aspectos expresivos e técnicos do 
repertorio con vistas a unha progresiva profesionalización da interpretación.
- O6.2. Fomentar a práctica instrumental como elemento lúdico en espazos alleos á propia Aula.

Os obxectivos O3.1., O5.1. e O6.1, no caso de que o alumnado poida cumprir cos requisitos e as 
circunstancias así o permitisen, poden ter continuidade coa formación de carácter semiprofesional 
que se realiza no Grupo de Música Tradicional.
Paralelamente, propóñense os seguintes obxectivos:
- O7. Realizar exercicios de quecemento, estiramento e concentración de forma guiada coa fin de 
adquirir hábitos saudables de estudo.
- O8. Aplicar os coñecementos musicais teóricos adquiridos na práctica instrumental.
- O9. Fomentar a igualdade na música tradicional mediante o estudo do repertorio de
compositoras e das referentes.

Grupos e horarios:

16:00 Gaita I

17:00 Gaita II

18:00 Dependendo da demanda, Gaita III ou Percusión iniciación 

19:00 Percusión 

20:00 Zanfona iniciación 

Os grupos distribuiranse de acordo ós criterios da profesora unha vez comezado o curso.

A docente será Marina Fernández Vigo

- XERAIS:
•  C1. Traballo de elementos chave que interveñen no fraseo musical (articulación, ornamentación e 
silencio) adecuándoos aos diferentes estilos interpretativos.
•  C2. Exercicio de improvisación de variacións melódicas sinxelas, así como de ornamentación, 
sobre melodías de corte tradicional.
•  C3. Estudo de traballos audiovisuais e bibliográficos sobre a música tradicional e o 
instrumento.
•  C4. Adestramento permanente e progresivo da memoria tanto a curto e longo prazo, como da memoria 
auditiva, mecánica e visual.
•  C5. Práctica da lectura a vista.
•  C6. Estudo das diferentes escalas e modos.
•  C7. Práctica de interpretación en conxunto en formacións habituais.
•  C8. Interpretación en público do repertorio traballado na aula
•  C9. Práctica de estiramentos, quecementos e exercicios de concentración.
- ESPECÍFICOS:
Gaita
•  Estudo e coñecemento das principais ornamentacións e articulacións
•  Práctica da afinación con sistemas de referencia propios
•  Práctica de afinación en conxunto
•  Estudo de repertorio propio do instrumento
•  Estudo de repertorio propio de outras cornamusas
•  Coñecemento dos principais intérpretes tradicionais e estilos interpretativos
Percusión:
•  Estudo das principais fórmulas rítmicas da música tradicional
•  Comprensión das estruturas rítmicas
•  Práctica dos diferentes instrumentos da percusión tradicional: pandeireta, tambor, bombo, 
culleres, tarrañolas, cunchas…
•  Comprensión  da  improvisación  como  ferramenta  musical  básica  na interpretación da 
percusión galega
•  Estudo de exercicios de técnica básica específicos a cada instrumento
Zanfona:
•  Estudo e coñecemento das principais ornamentacións e articulacións
•  Práctica da afinación con sistemas de referencia propios
•  Práctica de afinación en conxunto
•  Coñecemento dos principais intérpretes tradicionais
 

Prazo 1: 7 e 8 de setembro. Comunidade Universitaria (PDI, PTXAS e Alumnado). 10 prazas

Prazo 2: 10 a 14 de setembro. Público xeral e comunidade universitaria. 30 prazas + vacantes 1º prazo.