Fin prazo de inscrición: 17 de xuño de 2026

OBXECTIVOS E TEMÁTICA DO CURSO

• Este curso ten como obxectivo realizar un percorrido polos arquetipos femininos no xénero do terror, analizando os seus contextos histórico-culturais e os estereotipos de xénero nos que se sustentan. Animarase ao alumnado a comprender estes arquetipos desde unha perspectiva feminista, e a analizar criticamente como as diferentes narrativas nas que aparecen estas persoaxes poden resultar conservadoras ou subversivas, segundo o caso.
• O xénero do terror está a vivir unha época dourada na que se está afastando da idea de ser un xénero menor para converterse nun foco mediático e académico. A recente nominación a 16 Premios Óscar de Sinners (Coogler, 2025) bateu todos os récords e demostrou o que décadas de estudos sobre este xénero viñan a dicir: que a súa relevancia cultural non pode ser omitida. Numerosas estudosas do xénero como Barbara Creed, Carol Clover ou Linda Williams realizaron análises sobre os arquetipos femininos no cinema de terror e demostraron a importancia destas personaxes para os estudos feministas.

Durante as 4 semanas do curso (8 sesións de 4 horas cada unha) realizarase unha aproximación a sete arquetipos femininos no xénero do terror:

• a bruxa, a nai malvada, a ‘rapaza final’, a vampira, a posuída, a pantasma, e o súcubo. A oitava sesión dedicarase a reflexións finais e presentacións por parte do alumnado. En canto ao formato, o curso incluirá maioritariamente textos cinematográficos, así como referencias a figuras da literatura e a cultura popular, coa flexibilidade de que o alumnado poida traer a debate outro tipo de producións culturais tales como vídeos musicais, formatos televisivos ou videoxogos. En canto á orixe, a maioría dos textos e a bibliografía provirán do ámbito anglófono por ser a área de especialización da docente, pero tamén se fará referencia a producións doutros ámbitos (como o latinoamericano), de novo coa flexibilidade de que o alumnado propoña diferentes obras e contextos a analizar. Veranse obras de distintxs autorxs, pero farase fincapé na ausencia histórica de voces femininas en certas áreas culturais. Analizarase o rol da autoría e a posición de enunciación nas obras propostas.

Docente: Xiana Vázquez Bouzó

Para consultar a qué colectivo pertence, a efectos de descontos en actividades de extensión universitaria prema no seguinte enlace Colectivos Universidade de Vigo

Recoñecemento de créditos: Ao remate do curso entregarase un diploma acreditativo (asistencia obrigatoria ao 85 % das horas) con recoñecemento de 1 crédito ECTS para as ensinanzas de grao por cada 25 horas. O estudantado solicitará o recoñecemento de créditos no centro onde se imparta a titulación na que pretenda validar esas horas, presentando o certificado/diploma de aproveitamento da actividade.

1. Introdución ao xénero do terror e os estudos feministas sobre este xénero. Arquetipos conservadores e figuras subversivas. A bruxa.
2. Maternidades monstruosas. A nai no terror.
3. Decencia e supervivencia. A ‘rapaza final’ do cinema slasher.
4. A perda da inocencia: posesións femininas.
5. Sexualidades voraces: a vampira.
6. Espíritos de vinganza: a pantasma.
7. Femme fatales do inferno: súcubos.
8. Reflexións e presentacións finais.