Co fin de favorecer a conciliación da vida profesional e familiar dos membros da nosa comunidade universitaria en épocas de vacacións escolares, ao tempo que se achega a Universidade de Vigo aos mais pequenos, tódolos anos se celebra o CAMPUS CAMP nas datas estivais.

Este ano, vaise poñer en marcha unha nova edición deste programa pero adaptado ás datas de vacacións escolares en época de Nadal. Esta decisión tomouse desde a vicerreitoría de Extensión Universitaria tendo en conta, por unha banda, o interese amosado por parte da comunidade universitaria e por outra a posibilidade que nos proporciona o recentemente asinado Convenio de colaboración entre a Vicepresidencia Segunda e Consellaría de Presidencia, Xustiza e Deporte, a través da Secretaria Xeral para o Deporte, e as tres universidades públicas galegas para o desenvolvemento do Plan Corresponsables, polo que nesta ocasión terá carácter gratuíto.

Está destinado ás nais e pais pertencentes á comunidade universitaria da Universidade de Vigo (estudantes, P.A.S. e P.D.I) dos campus de Ourense, Pontevedra e Vigo, para as/os súas/seus fillas/os ou acollidas/os legalmente, con idades comprendidas entre os 3 e os 16 anos.

A idade límite aplicarase ao inicio da actividade o 23/12/2022.

Existe un número limitado de prazas que se irán adxudicando por orde de inscrición no Campus Activo, aínda que terán preferencia as familias que se inclúan nos seguintes supostos: monomarentais, monoparentais, vítimas de violencia de xénero e doutras formas de violencia contra a muller, mulleres en situación de desemprego de longa duración, mulleres maiores de 45 anos ou unidades familiares nas que existan outras cargas relacionadas cos coidados.

Os pasos a seguir para realizar a inscrición son os seguintes:

1º Nos datos persoais da persoa usuaria, haberá que comprobar se están dados de alta os fillos ou fillas como “usuarios/as tutelados/as” e teñen asignado o colectivo de “Fillo/a de persoa da comunidade Uvigo”.

2º Se están dados de alta, pero non lles figura o colectivo, haberá que entrar en cada un deles e pinchar en “+ Nova alta en colectivo especial”, seleccionar “Fillo/a de persoa da comunidade Uvigo” e subir o arquivo co libro de familia escaneado en tódalas follas.

Estos dous primeiros pasos pódense levar a cabo antes de que se inicie o prazo de inscrición do campusnadal.

3º Unha vez aberto o prazo de inscrición, haberá que entrar en Campus Camp do Nadal 2022 e unha vez autenticada a persoa usuaria, seleccionar como usuario ao fillo/a para a continuación elixir o periodo no que se inscribirá.

4º Unha vez confirmada a inscrición, se se quere inscribir un 2º ou sucesivos fillos/as, habería que premer no botón “volver” e, en nova inscrición, seleccionar o nome do seguinte fillo ou filla.