1. Condicións para ser considerado deportista de elite

Terán a condición de deportista de alto nivel aquelas persoas que estean matriculadas en estudos oficiais de grao ou posgrao na Universidade de Vigo e que se atopen nalgunha das seguintes situacións:

• Deportistas co recoñecemento oficial de deportista de alto nivel (DAN) ou deportista galego de alto nivel (DGAN).
• Deportistas coa consideración de deportistas de alto rendemento pertencentes ou non a un centro de tecnificación deportiva (CTD).
• Deportistas seleccionados polo equipo nacional, da modalidade deportiva correspondente, nos últimos dous anos, en calquera das súas categorías de idade.
• Deportistas participantes de maneira regular na máxima categoría estatal da súa modalidade deportiva, en categoría absoluta ou júnior, con licenza en vigor e que teñan representado, participado ou colaborado coa Universidade de Vigo na práctica e promoción do deporte universitario.
• Persoas adestradoras e técnicas, e xuíces e xuízas, que participen de maneira regular na máxima categoría estatal ou teñan a consideración de DGAN ou DAN.
• Deportistas erasmus e doutros programas de mobilidade cun nivel deportivo equiparable aos que se inclúen neste apartado.
• Deportistas do Programa da Asociación de Deportes Olímpicos (ADO) ou do Programa de apoio ao deporte obxectivo paralímpico (ADOP).

2. Duración da consideración de deportista de elite:

Esta consideración terá validez durante o curso académico no que se teña solicitado. A condición de deportista universitario de alto nivel perderase cando estas persoas deixen de cumprir os requisitos establecidos no punto 1, cando incumpran os deberes establecidos no Estatuto do Estudantado Deportista ou á finalización do curso académico correspondente

3. Dereitos

As persoas deportistas universitarias de elite gozarán das seguintes vantaxes:

• Elección do horario, quenda ou grupo, nos casos en que sexa posible, para compatibilizar a asistencia á clase coa súa actividade deportiva. 
• Xustificación de faltas de asistencia das sesións lectivas, de carácter obrigatorio, por participar en competicións oficiais e nas concentracións e nos adestramentos da selección española, mediante a correspondente certificación da federación deportiva.
• Flexibilización do calendario de exames cando coincida con competicións oficiais e con concentracións e adestramentos da selección española, xustificados mediante a certificación da federación deportiva correspondente. 
• Programas específicos de atención e de axuda para facilitar a conciliación dos estudos cos adestramentos e a práctica deportiva.
• Obtención do recoñecemento de ata 6 créditos ECTS pola súa actividade deportiva.
• Reserva non inferior ao 5 % en prazas das residencias universitarias.
• Recoñecemento da condición de estudante con necesidades especiais, tras solicitala.
• Obtención da condición de estudante a tempo parcial, tras solicitala.
• Valoración da súa cualificación de deportista de elite como mérito nos procesos de selección dos programas de mobilidade.
• Gratuidade no uso das instalacións deportivas propias da Universidade de Vigo 

4. Deberes:

• Colaborar coa Universidade de Vigo na divulgación e na promoción do deporte universitario, as boas prácticas no ámbito deportivo e os hábitos de vida saudable.
• Representar a Universidade de Vigo cando sexa requirido para tal efecto. Esixirase documentación acreditativa no caso de non ser compatible coa súa planificación anual de adestramentos e de competicións.
• No caso de incluírse no programa PIUNE, cumprir con todas as obrigas establecidas con carácter xeral para os e as participantes no programa; entre elas a xustificación documental de todas as faltas de asistencia.